जिसस काभ्रेको नवौं जिल्ला सभा, सभामुख अर्यालद्वारा पारदर्शी र जिम्मेवार स्थानीय शासनमा जोड

ज्ञानमणि नेपाल कालाेटाेपी

काभ्रेपलाञ्चोक । जिल्ला समन्वय समिति काभ्रेपलाञ्चोकको नवौं जिल्ला सभा तथा आर्थिक वर्ष २०८२/०८३ को प्रगति समीक्षा कार्यक्रम सम्पन्न भएको छ। कार्यक्रममा प्रतिनिधिसभाका सभामुख  डोलप्रसाद अर्याल प्रमुख अतिथिका रूपमा सहभागी हुनुभएको थियो ।

कार्यक्रम जिल्ला समन्वय समिति काभ्रेपलाञ्चोकका प्रमुख दीपककुमार गौतमको अध्यक्षतामा सम्पन्न भएको हो । विशेष अतिथिका रूपमा काभ्रेका प्रतिनिधिसभा सदस्यहरू मधु चौँलागाईं, बदन भण्डारी र राम लामा सहभागी हुनुभएको थियो । सभामा जिल्ला समन्वय समितिका प्रमुख गौतमले वार्षिक प्रगति विवरण तथा आगामी आर्थिक वर्षको नीति तथा कार्यक्रम प्रस्तुत गर्नुभएको थियो भने स्वागत मन्तव्य उपप्रमुख रिमबहादुर तामाङले राख्नुभएको थियो ।

कार्यक्रममा जिल्लाका प्रदेशसभा सदस्यहरू, प्रमुख जिल्ला अधिकारी, नेपाल प्रहरी, सशस्त्र प्रहरी बल र नेपाली सेनाका जिल्लास्थित प्रमुखहरू, १३ वटै स्थानीय तहका प्रमुख तथा उपप्रमुख, प्रमुख प्रशासकीय अधिकृत र विभिन्न वडाका वडाध्यक्षहरूको उपस्थिति रहेको थियो।

कार्यक्रमलाई सम्बोधन गर्दै सभामुख अर्यालले स्थानीय तहहरू नागरिकका घरदैलोका सरकार भएकाले पारदर्शी, जवाफदेही र जिम्मेवार भएर काम गर्नुपर्नेमा जोड दिनुभयो । उहाँले विगतका सरकारले नागरिकलाई सरकार भएको अनुभूति गराउन नसकेको टिप्पणी गर्दै न्यायपालिका, व्यवस्थापिका र कार्यपालिकाले समन्वयात्मकरूपमा काम गर्नुपर्ने आवश्यकता औंल्याउनुभयो। साथै कर्मचारीतन्त्रले पनि सोही भावनाअनुसार प्रभावकारी सेवा प्रवाह गर्नुपर्ने बताउनुभयो।

सम्बोधनका क्रममा सभामुख अर्यालले आफ्नो पार्टीका गतिविधिबारे समेत चर्चा गर्दै पार्टी सभापति रवि लामिछानेको जन्म जिल्ला काभ्रे भएकाले आफूहरूको जिल्लासँग विशेष सम्बन्ध रहेको उल्लेख गर्नुभयो । यस अवसरमा जिल्ला समन्वय समिति काभ्रेपलाञ्चोकले विपद् व्यवस्थापनमा योगदान पुर्‍याएको भन्दै जिल्लास्थित सुरक्षा निकायका प्रमुखहरू तथा विभिन्न स्थानीय तहलाई सम्मानसमेत गरेको थियो ।