कमल संघर्षको गजल सङ्ग्रह ‘हियाका कुडा’को विमोचन

काठमाडौँ । गजलकार कमल संघर्षद्वारा लिखित गजल सङ्ग्रह ‘हियाका कुडा’ एक समारोहका बीच लोकार्पण गरियो ।

शिखा बुक्सको आयोजनामा सम्पन्न समारोहमा विवेक ओझा, शितल कादिम्बनी, पूर्ण रावल, लेखक कमल संघर्ष र पुष्पराज पौडेलद्वारा संयुक्तरुपमा लोकार्पण भयो । न्याधन रामन, लक्ष्मण संगम, मदन बुढाले संग्रहमा रहेका गजल वाचन गर्नुभयो भने पूर्ण रावलले कमलले गजलमा खस भाषालाई जोडेर देशलाई नै गुन लगाएको बताउनुभयो ।

शितल कादम्बिनीले कमल हियाका कुडा पढेपछि आफूलाई डाह र इख लागेको बताउनु भयो । गजल जति पटक पढ्दा पनि त्यति धेरै पढ्न मन लाग्ने बताउनुभयो । उहाँले आफूले मन परेको गजल गायन पनि गर्नुभयो ।

मदन पुरस्कार विजेता विवेक ओझाले कमल आफ्नो समकालीन रहेको र उसका गजलबाट आफू सधैँ प्रभावित रहेको तथा हियाका कुडामा पश्चिम नेपालको इतिहासलाई गजलसित जोड्न साफल भएकोमा थप खुसी लागेको बताउनुभयो ।

लेखकले आफ्नो तेस्रो कृतिमा पनि पहिलाजस्तै मिहेनत गरेकाले पाठकहरुले मन पराउने बताउनुभयो । कमल संघर्षका सडक र खुडी प्रकाशित छन् भने शिखा बुक्सले प्रकाशन गरेको हियाका कुडाको मूल्य ३५०।–  रहेको छ ।