शुक्रबार साँझदेखि बाढीले अवरुद्ध बीपी राजमार्ग सञ्चालनमा आयाे

काभ्रे । शुक्रबार साँझको वर्षापछि रोशी खोलामा आएको बाढीले अवरुद्ध बीपी राजमार्ग सञ्चालनमा आएको छ। आज बिहान ६ बजेदेखि साे सडकमा यातायात सञ्चालनमा आएको हाे ।

जिल्ला प्रहरी कार्यालयले सडकमा दुईतर्फी यातायात सञ्चालनमा आए पनि मौसम प्रतिकूलतालाई ध्यान दिँदै यात्रा गर्न अनुरोध गरेको छ ।

शुक्रबारदेखि परेको वर्षाले रोशी क्षेत्रमा अस्थायी सडकसमेत बगाएकाे थियाे । यसअघि कार्यालयले राजमार्ग नखुलेसम्म सवारी आवागनममा रोक लगाउँदै आएको थियो ।

बाढीले रोशी क्षेत्रको चौकीडाँडादेखि नेपालथोकसम्म विभिन्न स्थानमा करिब चार किलोमिटर ‘डाइभर्सन’ बगाएको थियो । सडक विभाग, नेपाल प्रहरी, ट्राफिक प्रहरी र स्थानीयको सहयोगमा अस्थायी डाइभर्सन निर्माण गरी यातायात सञ्चालनमा ल्याइएको हो ।

फाइल फाेटाे