आज ४५औँ विश्व खाद्य दिवसः नेपालमा पनि विविध कार्यक्रम गरि मनाइँदै

काठमाडौँ । विश्वभर आज ४५औँ विश्व खाद्य दिवस मनाइँदै छ। स्वच्छ, पोषणयुक्त र सन्तुलित भोजनको महत्त्वबारे जनचेतना फैलाउने उद्देश्यले प्रत्येक वर्ष अक्टोबर १६ मा यो दिवस मनाउने गरिन्छ।

यस वर्षको दिवस ‘स्वच्छ खाना र सुखद भविष्यका लागि हातेमालो’ भन्ने नाराका साथ मनाइँदै छ। नेपालमा पनि कृषि विभागले संयुक्त राष्ट्रसङ्घको खाद्य तथा कृषि सङ्गठन (एफएओ), खाद्यका लागि कृषि अभियान लगायतका संस्थाहरूसँग समन्वय गरी विभिन्न कार्यक्रम आयोजना गरेको छ।

विभागका अनुसार दिवसका अवसरमा खाद्य प्रदर्शनी, जानकारीमूलक कार्यक्रम, पोस्टर प्रकाशन, सन्देश प्रसारण लगायत गतिविधि सञ्चालन हुनेछन्। दिवस मनाउनका लागि कृषि विभागका महानिर्देशक प्रकाशकुमार सञ्जेलको अध्यक्षतामा मूल समारोह समिति गठन गरिएको छ।

संयुक्त राष्ट्रसङ्घको २०औँ साधारण सभाले सन् १९७९ मा खाद्य तथा कृषि सङ्गठन (एफएओ) को स्थापना दिवसका अवसरमा खाद्य दिवस मनाउने प्रस्ताव पारित गरेको थियो। त्यसयता सन् १९८१ देखि हरेक वर्ष विश्व खाद्य दिवस मनाइँदै आएको छ। नेपालमा पनि याे दिवस मनाइन्छ ।