प्रतिनिधिसभा सदस्य निर्वाचन: आज देशभर उम्मेद्वारी दर्ता उत्साहजनक

काठमाडौँ । आगामी फागुन २१ गते हुने प्रतिनिधिसभा सदस्य निर्वाचनको प्रत्यक्षतर्फका लागि आज देशभर उत्साहजनकरुपमा उम्मेद्वारी दर्ता भएकाे छ ।

निर्वाचन आयोगले देशभरका १६५ वटै निर्वाचन क्षेत्रमा निर्वाचन कार्यालय स्थापना गरी आजका लागि उम्मेद्वारी दर्ताकाे कार्यसूची निकालेकाे थियाे ।

उम्मेद्वारी दर्ता गर्न जाँदा कुनै पनि तडकभडक नगर्न, शान्तपूर्वक र मर्यादित भएर निर्वाचन कार्यालय पुग्न सबै राजनीतिक दल तथा सम्बद्ध उम्मेद्वारहरूलाई आयोगले आग्रह गरेको थियाे । साेही अनुसार अधिकांश भागमा उम्मेद्वारी भएकाे छ । करिब ३ हजार उम्मेद्वारले उम्मेद्वारी दर्ता गराएका आयाेगले जनाएकाे छ ।

उम्मेद्वार मनोनयन दर्ताका लागि नागरिकताको प्रमाणपत्रको प्रतिलिपी वा मतदाता परिचयपत्रको प्रतिलिपी अनिवार्य गरिएको छ ।

उम्मेद्वारले धराैटी बापत १० हजार बुझाएका छन् । महिला, दलित, अपाङ्गता भएका नागरिक वा अल्पसंख्यक वर्गका उम्मेद्वारकाे हकमा भने ५० प्रतिशत मात्र बुझाए पुग्ने पनि आयाेगले प्रष्ट पारेकाे छ ।