मेलम्ची नगरपालिकाद्वारा बजार अनुगमन : मूल्यसूची अनिवार्य राख्न व्यवसायीलाई निर्देशन

सिन्धुपाल्चाेकः उपभोक्ताको संरक्षण, बजार अनुशासन कायम तथा व्यवसायिक पारदर्शिता सुदृढ गर्ने उद्देश्यसहित मेलम्ची नगरपालिकाले तीन दिने सशक्त बजार अनुगमन अभियान सम्पन्न गरेको छ । नगरपालिकाको नेतृत्वमा भएको उक्त अनुगमन कार्यक्रममा नगर उद्योग वाणिज्य संघ, उपभोक्ता हित संरक्षण मञ्च, सुरक्षा निकाय, सञ्चारकर्मी तथा सरोकारवालाहरूको उल्लेखनीय सहभागिता रहेको थियो ।

वैशाख २९ देखि ३१ गतेसम्म सञ्चालन गरिएको अभियानमा मेलम्ची, बाहुनेपाटी, भोटेचौर, तालामाराङ, दुवाचौर, सिन्धुखोला लगायतका प्रमुख बजार क्षेत्रमा सञ्चालित खाद्य पसल, होटल, ग्यास डिलर, बेकरी तथा अन्य व्यवसायहरूको स्थलगत निरीक्षण गरिएको हो ।

अनुगमनका क्रममा अधिकांश व्यवसायहरूलाई वस्तु तथा सेवाको स्पष्टरुपमा देख्नेगरी मूल्यसूची अनिवार्यरूपमा राख्न निर्देशन दिइएको छ । उपभोक्तालाई ठगी, कालोबजारी तथा मनपरी मूल्य निर्धारणबाट जोगाउने लक्ष्यसहित नगरपालिकाले यस अभियानलाई “मूल्यसूची सप्ताह” का रूपमा अघि बढाएको हो ।

नगरपालिकाले व्यवसायीहरूलाई गुणस्तरीय सेवा, स्वच्छ व्यापारिक अभ्यास तथा कानुनी मापदण्डको पूर्ण पालना गर्न आग्रह गरेको छ। साथै बजारलाई व्यवस्थित, उत्तरदायी र उपभोक्ता मैत्री बनाउन आगामी दिनमा समेत नियमित तथा प्रभावकारी अनुगमनलाई निरन्तरता दिइने स्पष्ट पारिएको छ ।

यस अभियानलाई सफल बनाउन अहोरात्र खटिनुहुने जनप्रतिनिधि, कर्मचारी, उद्योग वाणिज्य संघ, उपभोक्ता हित संरक्षण मञ्च, सुरक्षा निकाय तथा सञ्चार क्षेत्रका प्रतिनिधि प्रति मेलम्ची नगरपालिकाले हार्दिक कृतज्ञता व्यक्त गरेको छ ।