सगरमाथाको चुचुरोमा एकै दिन २७४ जना आरोही

काठमाडौँ । हिमाल आरोहणका लागि सबैभन्दा उपयुक्त मानिने वसन्तकालीन आरोहण अन्तर्गत बुधबार एकै दिन २७४ जना आरोही सगरमाथाको चुचुरोमा पुगेका छन् । पर्वतारोहण सञ्चालक सङ्घका अनुसार वैशाख ३० गते सगरमाथा आरोहणको बाटो खुलेयता बुधबार स्वदेशी र विदेशी आरोही गरेर सर्वाधिक २७४ जना आरोही चुचुरोमा पुगेका हुन् ।

पछिल्लो दुई दिनयता हिमआँधीको वेग बढ्दै गए पनि मौसमको अवस्था अनुसार अबको एक सातामा आरोहणको पर्खाइमा रहेका थप आरोही शिखरमा पुगेपछि यस वर्ष सर्वाधिक आरोहीले आरोहण गरेको कीर्तिमान बन्न सक्ने सङ्घले जनाएकाे छ । त्यसैगरी ल्होत्सेमा ५० भन्दा बढी र नुप्सेमा १६ जनाभन्दा बढी आरोहीले आरोहण पूरा गरेका छन् । यस वर्ष ल्होत्से आरोहण गर्न १४३ जना र नुप्से आरोहण गर्न ५६ जनाले अनुमति लिएका छन् ।

पर्यटन विभागका अनुसार वसन्तकालीन आरोहणका लागि यस वर्ष सगरमाथामा ४९४ आरोहीले अनुमति लिएका छन् । हरेक अनुमति लिने आरोहीका साथमा सहयोगी शेर्पासमेत रहने भएकाले यसपटक एक हजार हाराहारी आरोही सगरमाथाको शिखरमा पुग्ने अपेक्षा गरिएको छ ।

विभागबाट जारी भएको आरोहण अनुमति अनुसार यस वर्ष सगरमाथा आरोहणका लागि लिएको अनुमति सङ्ख्या हालसम्मै सर्वाधिक हो । यसअघि सन् २०२१ को वसन्तकालीन याममा ४०८, सन् २०२२ मा ३२५, सन् २०२३ मा ४७८, सन् २०२४ मा ४२१ र सन् २०२५ को यही याममा ४५६ जना आरोहीले आरोहण अनुमति लिएका थिए ।

विभागका अनुसार यस वर्ष सगरमाथा आरोहण गर्न नेपालसहित ५५ देशका आरोहीले अनुमति लिएका छन् । जस अनुसार सबैभन्दा बढी चीनबाट १०९, अमेरिकाबाट ७७, भारतबाट ६१, बेलायतबाट ३२, रसियाबाट १८ र जापानबाट १२ जना आरोहीले अनुमति लिएका छन् । यस याममा आरोहणका लागि विभागले छ हजार मिटरभन्दा माथिका उचाइका ३० वटा हिमालमा आरोहण अनुमति जारी गरेको छ । जस अनुसार सबैभन्दा बढी सगरमाथामा ४९४, ल्होत्सेमा १४३, अमादब्लम १११, मकालु (पहिलो) मा ७२, नुप्सेमा ५६ जना आरोहीले अनुमति लिएका छन् ।गोरखापत्रबाट