नेपाली महिला क्रिकेट टिमले मलेसियासँग टी २० सिरिज खेल्ने

काठमाडौँ । नेपाली महिला राष्ट्रिय क्रिकेट टोली र मलेसियाको टाेलीबीच पाँच खेलको टी–२० अन्तर्राष्ट्रिय शृंखला हुने भएको छ।

आगामी अक्टोबर २ देखि ८ सम्म मलेसियाको क्वालालम्पुरमा शृंखला आयोजना हुने नेपाल क्रिकेट संघ क्यानका प्रवक्ता छुम्बी लामाले विज्ञप्तिमार्फत जानकारी दिनुभयाे ।

उक्त प्रतियोगिताका लागि क्यानले शनिबार नै १४ सदस्यीय टोलीको घोषणा गरेको छ। यसलाई आगामी जनवरीमा घरेलु मैदानमा हुने महिला टी–२० विश्वकपको ग्लोबल छनोटको तयारीका रूपमा लिइएको छ ।

खेलाडीहरूले शृंखलाअघि सेप्टेम्बर २४ देखि ३० सम्म हुने ‘मलेसियन सुपर वुमन सिरिज’ मा पनि भाग लिनेछन् । यस प्रतियोगितामा घोषित टोलीका १४ खेलाडीले विभिन्न पाँच टोलीबाट खेल्दै थप अनुभव बटुल्ने अवसर पाउने बताइएकाे छ।