जिल्ला सहकारी संघ काभ्रेको ४४ औं साधारण सभा सम्पन्न

बनेपा । जिल्ला सहकारी संघ लिमिटेड काभ्रेले ५८ औं स्थापना दिवस तथा ४४ औं वार्षिक साधारण सभा सम्पन्न गरेको छ ।

बनेपामा शनिबार आयोजित एक कार्यक्रमका बीच साधारण सभा सम्पन्न भएको हो । कार्यक्रमको प्रमुख अतिथी, संघका अध्यक्ष अमन पोटे श्रेष्ठले उद्घाटन गर्नुभएको हो । उहाँले दिनुभएको जानकारी अनुसार यो संस्था २०२४ साल भदौ २६ गते सहकारी विभाग काठमाडौंमा दर्ता भएको हो ।

अहिले यसको मुख्य कार्यालय बनेपा ७ मा रहेको छ । यसले जिल्लाभरका स्थानीय तहहरुमा संचालित सहकारीहरुलाई गुणस्तरिय सेवा प्रदान गर्दै सहकारी क्षेत्रको सहजिकरणका लागि प्रारम्भिक सहकारी र संघबीचको दुरीलाई कम गरि आपसमा मर्यादित र व्यवस्थित सहकारी विकासको परिकल्पनासहित अभियानलाई मूर्तरुप दिन संघको भूमिकालाई पारदर्शी र व्यवस्थित बनाउने उद्देश्यले पाँचखाल, भकुण्डे र पनौतीमा सेवाकेन्द्र संचालन गरिरहेको छ ।

संघले गत आर्थिक वर्षमा कूल १ अर्ब ४१ करोड ६९ लाख १ हजार ९४२ रुपैंयाँको कारोबार गरेको छ । जसबाट १ करोड १४ लाख ६७ हजार ४३० नाफा गरेको छ । यस्तै चालु आर्थिक वर्षका लागि १ अर्ब ४६ करोड २१ लाख ७५ हजार १२ रुपैंयाँ कारोबार गरि २ करोड ६ लाख ९८ हजार ८८२ नाफा गर्ने लक्ष्य लिइएको छ । संघमा हालसम्म काभ्रेका १३ वटै पालिकाबाट ५९४ वटा सहकारी संस्थाहरु आबद्ध रहेको संस्थाका सचिव प्रकाश बञ्जाराले जानकारी दिनुभयो ।

संचारकर्मी न्यौपाने पुरस्कृत
यसैबीच जिल्ला सहकारी संघले आफ्नो वार्षिक कार्यक्रमअनुसार जिल्लामा सहकारी क्षेत्रमा कलम चलाउने एक जना पत्रकारलाई सम्मान तथा पुरस्कृत गर्दै आएको छ । यसैक्रममा संस्थाले यस वर्ष काभ्रे टाइम्समा आबद्ध पत्रकार रमेश न्यौपानेलाई पुरस्कृत गरेको हो । उहाँले विगत २७ वर्षदेखि पत्रकारितामार्फत सूचना प्रवाह गर्दै योगदान दिएको भन्दै संस्थाले नगद १० हजार र प्रमाणपत्रसहित पुरस्कृत गरेको हो ।