आईसीसी टी-ट्वान्टी विश्वकप छनाेटः नेपालद्वारा सामोआलाई २१२ रनकाे लक्ष्य

काठमाडौँ । आईसीसी टी-ट्वान्टी विश्वकप एसिया तथा इस्ट एसिया प्यासिफिक छनोट अन्तर्गत अहिले नेपाल र सामोआबीच खेल भइरहेकाे छ।

ओमानको अल अमिरतस्थित ओमान क्रिकेट एकेडेमी टर्फ–१ मा सामोआले टस जितेर फिल्डिङ रोजेपछि ब्याटिङ गरेको नेपालले २ सय १२ रनको विशाल लक्ष्य दिएको छ। निर्धारित २० ओभरमा ४ विकेट गुमाउँदै २ सय ११ रन बनाएपछि सामोआले उक्त लक्ष्य पाएको हो ।

आजको खेलमा नेपालका ओपनर आशिफ शेख र मिडिल अर्डर ब्याटर दीपेन्द्रसिंह ऐरीले अर्धशतकीय पारी खेलेका छन् । शेखले ४ छक्का र ७ चौका प्रहार गर्दै ४१ बलमा ६९ रन बनाए । त्यस्तै, ऐरीले ३३ बलमा ४ छक्का र २ चौका प्रहार गर्दै ५३ रन जोडे ।

आजको खेल जितेमा नेपाल अपराजित रहँदै उक्त प्रतियोगिताको च्याम्पियन बन्नेछ। छनोटका समूह चरण र सुपर सिक्समा नेपाल एक मात्र अपराजित टोली हो। यता सामोआले सुपर सिक्समा कुनै खेल जितेको छैन ।