प्रहरीद्वारा पुसमा दुई हजार २९६ जना फरार प्रतिवादी पक्राउ, १८ करोड ९० लाख जरिवाना असुल

• ज्ञानमणि नेपाल कालोटोपी

काठमाडौँ । नेपाल प्रहरीले देशका विभिन्न भागबाट गत पुस महिनामा मात्रै दुई हजार २९६ जना फरार प्रतिवादीहरुलाई पक्राउ गरेको छ । प्रहरीले दिएको तथ्यांक अनुसार सात वटै प्रदेशमा गरि सो संख्यामा फरार प्रतिवादी पक्राउ परेका हुन् ।

जसमा सबैभन्दा बढी मधेश प्रदेशबाट पक्राउ परेका छन् । यहाँ ४५३ जना प्रतिवादी पक्राउ परेका हुन् । उनीहरुबाट ३६ लाख २० हजार २०६ रुपैंयाँ जरिवाना असुल गरिएको छ । यस्तै कोशी प्रदेशमा ३९६ जना पक्राउ परेका छन् । यहाँ १ करोड ९ लाख ५८ हजार १६८ रुपैंयाँ जरिवाना असुल गरिएको प्रहरीले जनाएको छ ।

वागमती प्रदेशका १० जिल्लामा ३८६ जना फरार प्रतिवादी पक्राउ परेका छन् । उनीहरुबाट २ करोड १२ लाख ६५ हजार ३२५ रुपैंयाँ जरिवाना असुल गरिएको छ भने वागमतीकै काठमाडौं उपत्यकाका तीन जिल्लाहरुबाट २६९ जना पक्राउ पर्दा ३ करोड ५१ लाख २८ हजार ६०७ रुपैंयाँ असुल गरिएको छ । उता गण्डकी प्रदेशमा प्रतिवादी पक्राउ पर्नेको संख्या १४४ जना छ । यहाँ चार करोड ६३ लाख ९८ हजार ३०६ रुपैंयाँ जरिवाना असुल गरिएको तथ्यांकमा उल्लेख छ ।

लुम्बिनी प्रदेशमा २५७ जना पक्राउ परेका छन् । उनीहरुबाट एक करोड ६२ लाख चार हजार ४४८ रुपैंयाँ जरिवाना असुल गरिएको छ । कर्णालीमा सबैभन्दा कम अर्थात ४४ जना प्रतिवादी पक्राउ पर्दा ५४ लाख ९१ हजार ३३३ रुपैंयाँ जरिवाना असुल गरिएको छ । सुदूरपश्चिममा भने ३४४ जना प्रतिवादी पक्राउ पर्दा १ करोड ५३ लाख ५६ हजार ४७३ जरिवाना असुल गरिएको प्रहरीको तथ्यांक छ ।

उल्लेखित फरार प्रतिवादीबाट समग्रमा १८ करोड ९० लाख २२ हजार ८६६ रुपैंयाँ जरिवाना असुल गरिएको छ । ती प्रतिवादीहरुलाई कैद भुक्तानका लागि ९१४ वर्ष ५ महिना ४ दिनको समय तोकिएको पनि प्रहरीले दिएको तथ्यांकमा उल्लेख छ ।